محاورة للشاعر الكبير مستور العصيمي= مطلق الثبيتي

احمد الناصر:

سلامي رده صافيه سويتها وابدي بها
تسمعوا يامن حضر سلامي رده صافيه
يازين درب العافيه ياطيبها,, يا طيبها
نصف الشهر خمسة عشر,, يازين درب العافيه

مستور العصيمي:

تبا تبان الخافيه والدار نعرف ذيبها
واليا بدا نور القمر تبا تبان الخافيه
خل القلوب الصافية تضحك وتظهر غيبها
وانا معي وجهة نظر يا أهل القلوب الصافية

أحمد الناصر:

ترى الاشارة كافيه قصة يصيب مصيبها
واليا سريت اخذ الحذر ترى الاشاره كافيه
هات العلوم الوافيه لك عادة اتجيبها
احذف حجر واقلب حجر هات العلوم الوافيه

مستور :

انا لبوسي ضافيه جيب الحقيقة جيبها
آخذ خبر واعطي خبر وانا لبوسي ضافيه
ترى الليال الدافيه كل العرب تمشي بها
وانته على جال البحر وقت الليالي الدافيه

أحمد :

دربيلنا كشافيه دنياك ما اعرف غيبها
واحسابنا طرح وجبر دربيلنا كشافيه
اخلاف ماش خلافيه تقبل ولا تقضي بها
والريف أخير من الدهر واخلاف ماش خلافيه

مستور:

ياللي بنيت القافيه وراك ما تبني بها
حط الحجر فوق الحجر ياللي بنيت القافيه
بعض السوالف كافيه اصبح بها وأمسي بها
يا عود داخلك الكبر بعض السوالف كافيه

أحمد :

بالوسط والاطرافيه علومي ما تدري بها
دعوى يضيق بها النحر بالوسط الاطرافيه
يا للي عيونك غافيه تفتح ولا تغضي بها
عبره من كبار العبر ياللي عيونك ضافيه

هذه المحاور جمعت عميد المحاورة أحمد الناصر مع العملاق الشاعر صياف بن عواد الحربي:
أحمد :

شليويح بن شلاح المطيري مثل الاشوام
سلامه مرحبا بك من بعيد اليا بعيدي
تغير واختلف طبعه على ربعه من العام
رمى قلب قديم وشاري قلب جديدي

صياف :

شليويح المطيري ما تعدى دين الاسلام
واقوله بالنيابه عنه والعايد يعيدي
لعلك يا أحمد الناصر تجي وتروح قدام
وتصبح في اوسط الديره شقي والا سعيدي

أحمد :

تهرج بالرضا حيث الرضا هو سيد الاحكام
وخلق الله تفكر بالقريب وبالبعيدي
انا أعرف الليالي السود وبيض الايام
وترى ما نيب اعيد لين اوكد يوم عيدي

صياف :

تهرجنا وفكرنا وفسرنا بالاحلام
وجبنا لك خبر مضمون بالعلم الوكيدي
فتشنا في صحنكم ما لقينا خبز وايدام
ما غير القدر والطاسه ومسواط العصيدي

أحمد :

يقولون الضوامي هالليالي ورد وحيام
ولا ضد الحديد الا القوي من الحديدي
ضعيف الحيل ما ينفع ليا انه طاح ما قام
ولو ينزل بعد بكره يطري فالشديدي

صياف :

وقف في دربها مجنون لا صلى ولا صام
لعله عقبها يقعد مع العالم وحيدي
لو ان ام الكباير ما عطوها خرص وزمام
ما يمديها تغني لك بنوع من القصيدي

أحمد :

أنا ما نيب احب الظلم مار الناس ظلام
اجنب خزنه السلطان ابن عبدالمجيدي
احد يحكم عليه اليا جهل في حكم الاعدام
خطير انه يذكى مثل تذكاة الهريدي

صياف :

أنا عارف وداري واعرف ان الظلم هدام
ومن يخطي على المسلم ترى قلبه بليدي
ومن يشري لك البندق يبايشري لك حزام
لو ان الموت فوق الحنجرة تحت الوريدي

أحمد :

ترى ما طاب للرجال ياصياف مادم
معك قلب كبير ولا معك رأي سديدي

وهذه المحاورة بين شاعرنا ورفيق دربه الشاعر الراحل مطلق الثبيتي يرحمه الله في المغترة في ضيافة محب فن المحاورة الامير فيصل بن خالد حفظه الله عام 1406ه.
مطلق الثبيتي:

قبل شهر رمضان الليل هذا مثل ليل العيد
عسى ربي يطول عمر من نمشي على نوره
تهرج يا أحمد الناصر وصك الحيد جنب الحيد
ولا تزعل على مستور والأحوال مستوره

أحمد الناصر:

اظن العيد عيد للجميع مبارك وسعيد
وهذي عادة ما تختلف لعيال اخو نوره
عسى من فاد راسك يالثبيتي ما يفيد الفيد
ترى مستور أخوي ورفقته في القلب مبذوره

مطلق :

ترى عقل البني آدم يا أحمد الناصر سواة القيد
يخلي السر دايم صرة في الجيب مصروره
نسيت الفقه والتوحيد والتفسير والتجويد
بعد عودة معهم كل يوم تلعب الكوره

أحمد :

تهرج يالثبيتي وانت ابو ما تشتهي وتريد
ليا ضيعت دربك نزهدك في راس باكوره
تكايدني وانا خابرك رجال تحب الكيد
جوازك للسفر ما فيه توقيع ولا صوره

مطلق:

عطوك البندقية مار ياجعلك تصيد الصيد
لها روحين مار البندقة ما هيب ممهوره
يجيبون الدوا للعود يبغونه يصير وليد
وإلى شافوه يعرج بين اهل رابغ ومستوره

أحمد :

تشوف اللي قريبه يا لثبيتي ما تشوف بعيد
سواة التاجر اللي في البحر غرقان بابوره
اظن الفقع في جنب الرقه والعلم بالتأكيد
ولو ما تحسن اللحيه لقيت البيض منثوره

مطلق :

انا ما ابغاك تمشي في الدروب العوج يا بوزيد
ولا يطرحك درهام الجمل بالارض عن كوره
انا با خذك بالمعروف وانت العم وانت السيد
رجاجيل الجميله بين كل الناس مشهوره

أحمد :

تهددني ولا يزمل عميلك راعي التهديد
واخبر الناس يارجال منهية وماموره
نبي نرضيك يارجال والميت عساه شهيد
وعقب أقرا عليك العاديات من اول السوره

يسلموووووووو ع الطرح راق لــــي

ماننحرم منك

تقبل مروري

» محاورة صياف الحربي وابن شايق
» محاورة العير وحبيب موال قووووووووي جداااااا
» 1/3 محاورة رباعي رائعة على لحن ناقتي يا ناقتي الشعراء